Posts
بچے کی دُعا
لب پہ آتی ہے دُعا بن کے تمنا میری
زندگی شمع کی صورت ہو خدایا میری
دُور دنیا کا مرے دم سے اندھیرا ہو جائے
ہر جگہ میرے چمکنے سے اجالا ہو جائے
ہو مرے دم سے یونہی میرے وطن کی زینت
جس طرح پھول سے ہوتی ہے چمن کی زینت
زندگی ہو مری پروانے کی صورت یا رب
علم کی شمع سے ہو مجھ کو محبت یا رب
ہو مرا کام غریبوں کی حمایت کرنا
دردمندوں سے ضعیفوں سے محبت کرنا
مرے اللہ! برائی سے بچانا مجھ کو
نیک جو راہ ہو اس رہ پہ چلانا مجھ کو
علامہ محمداقبال (رح).
آج نو نومبر ہے۔ ڈاکٹر محمد اقبال کا یومِ پیدائش۔ ویسے عالمِ بالا میں علامہ اقبال افسوس ہی کرتے رہتے ہوں گے کہ ان کے لوگ کیسی نالائق قوم ثابت ہوئے ہیں۔ :shy:
بہرحال۔ اللہ سے بہتری کی امید رکھنی چاہئیے ہمیشہ۔ شاید ہم بھی کبھی فخر کے ساتھ یومِ اقبال منا سکیں۔
علامہ کی یہ نظم میرے رگ و پے میں رچی بسی ہے۔ کامل پانچ سالوں تک روزانہ، اپنے دو کمروں پر مشتمل پرائمری اسکول کے احاطے میں کھڑے ہو کر پوری آواز سے گلا پھاڑ پھاڑ کر اسے پڑھا اور پڑھایا کرتا تھا۔ :)
اللہ تعالٰی علامہ کے درجات بلند فرمائیں!
اللہ تعالٰی اس قوم کو وہ شعور عطا فرمائے جس کو جگانے کے لئے علامہ ہمیشہ بے چین رہے۔ اٰمین
وارث: :)
ہم لوگوں کے سکول میں بھی یہ دعا پڑھی جاتی تھی۔ اس کی مخصوص لے مجھے اب بھی یاد ہے۔ پھر پہاڑ اور گلہری ، گائے اور بکری، مکڑا اور مکھی جیسی کتنی نظمیں تھیں جو ہمیں زبانی یاد تھیں۔ پتہ نہیں اب بھی سکولوں میں یہ دعا پڑھی جاتی ہے یا نہیں۔
ڈفر: آمین۔ اللہ تعالیٰ آپ کی دعا جلدی سے قبول فرمائے۔